Rebecca in Australien

Ich ha nur sehr churz Zit und wot vor allem saege, dass es mer leid tuet, dass ich bis jetzt leider in Melbourne no keis (zahlbars) Internet-Cafe gfunde han, wo ich mini Fotos uf d Homepage ufelade chan. Ihr muend euch aso leider no chli gedulde, sorry!

Uf de Witerreis i Richtig Lake Entrance simer nach Suggan Buggan cho. Das isch wohl de chlinsti Town, wo s uf de ganze Welt git. Es het naemli det nur ei einzigi Iwohnerin plus es chlises Schuelhuesli, wo aber mal fast abebraennt waer.

Spoeter haemer es paar kurligi, aber cooli Kunstobjekt gseh, wo vo zwei Bruedere us Abfall gmacht werded. Sie hend zum Bispiel es Kangaroo mit Bruest gmacht. De Ort het Seldon Seen gheisse, falls oeper mal det hi wot.

Nachher simer daen uf Lake Entrance cho, wo euses Hostel Riviera Backpackers gheisse het. De Ort heisst Lake Entrance, da anschinend alli Flues vo de Snowy Mountains i verschiedeni See fluesed und die daen det zaemae choemed und daen is Meer fluessed. Mir sind daenn no in Supermarkt go de Zmitag fuer morn chaufe und nacher hets endlich oepis Znacht gae: Roast Beef mit Pommes und Salat.

von rebifurrer um 02:32 | Kommentare (0) | Trackbacks (2)

So, jetzt meld ich mich endlich mal wieder. Leider chani grad a de Fotos nuet mache und au kei ufelade, da das i dem Internet-Cafe noed gat. Defuer soets zumindest gratis si.

Also, nach em letste Itrag bin ich is Hostel go packe und ha daenn mit em Niederlaender en Deal gmacht, wudurch i zume super feine Curry cho bin. Ich ha ebe no chli Muesli und e ganzi Flaesche Milch gha und er het mich gfroegt, oeb ich mit ihm Currz esse welli, da s fuer ei Person sowieso zvil segi. Da ich eifach kei Essware ha welle im Bus mitschleppe, ha ich ihm daen d Milch und s Muesli ge und ha defuer mit ihm choene esse. Het sich aso glohnt gha!

Am noechste Morge hani daenn um 5.45 muesse ufstah und leider hets wie us Chueble abeglaehrt. Ich ha mit em ganz Sack und Pack bi stroemendem rege muesse e halb Stund dur die ganzi City laufe und bi aso sehr froh gsi, dass min Rege-Ueberzug vom Rucksack dicht gsi isch. Ich bi daenn zfrueh gsi, aber so bini zumindest im Trochne no chli zum Brot esse cho.

Normalerwis sind bi Adventure Tours maximal 24 Luet i einere Gruppe, mir sind aber zum Glueck nur 9 Luet plus ein Guide, de Bones, gsi. De Bones heisst eigentlich Craic, aber bi Adventure Tours choemed alli en Spitzname ueber und da er halt nur Huut und Chnoche, aso skin and bones, gsi isch, hend s ihn ebe Bones gnaennt. Susch isch no en Schwizer, wo ide Noechi vo Genf wohnt, e Duetschi, e Daenin, drue Englaenderinne, ei Franzoesin und ein Franzos debi gsi.

De ersti, richtige Halt isch in Canberra, aso de australische Hauptstadt, gsi, wo mir nach eme fruehe Mittagesse daen zum nationale Museum gange sind. Das isch sehr modern baut gsi und isch sehr interessant und guet gmacht gsi. Es isch ame kuenstliche See glaege, aso i fantastischer Umgebig. Aja, wichtig isch no zsaege, dass s Waetter wunderschoen gsi isch, aso sunnig und warm. Das isch aso mal herrlich gsi!

De noechsti Halt isch daenn bim Parlamentsgebaeude gsi, wo mer daenn e super Tour mitgmacht hend. Das Ganze gseht sehr konstruiert und perfekt us, was halt da dra lit, dass es au extra konstruiert worde isch. Vorher isch da nur Farmland gsi und mer het Canberra und s Parlamentsgebaeude daenn genau det erbaut, da s genau ide Mitti vo Melbourne und Sydney isch. Die beide Staedt hend sich ebe dazumals um d Hauptstadt gstritte und drum het mer halt e neui ide Mitti vo beidne gmacht!...

Nachher simer id Snowy Mountains gfahre, das sind die hoechste Berge uf de Suedhalbchugle und somit au vo Australie. De hoechst Berg isch chli meh als 2200 meter ueber Meer, aber im Verglich zu de Schwiz sind d Berge vil flacher und es het Eukalyptus-Baeum bis sehr wit ufe.

In Jindabyne hend mir uebernachted und det het s es paar Billard-Tisch gha. Mir, drue Fraue, sind noed lang am spiele gsi, daenn simer scho vo es paar Manne usegforderet worde. Sie sind die meiste vo Canberra, schaffed aber ide Snowy Mountains. Usserdem het s drue Manne gha, wo Tauch-Instrukter sind resp. de Koreander isch erst i de Usbildig gsi. Es isch uf all Faell sehr luschtig gsi.

Am noechste Morge hemer daen am 7h Zmorge gha und sind am 8i abgfahre, zum daen e 3h-Wanderig ide Berge zmache. Es isch eus gseit worde, dass mer uf knapp 2000 meter ufe goend und dass es sehr chalt segi, aber mir hend wuerklich super Wetter gha und es isch so warm gsi wie ich s bis jetzt noni erlebt gha han in Australie. D Landschaft isch u schoen gsi und de chlini Fluss und de "blue lake" ebefalls.

Nachher simer am Snowy river entlang gfahre, was wurklich e wunderschoeni Landschaft gsi isch. Ich ha mich gfuehlt, als waer ich in Kanada, obwohl ich ja no nie det gsi bin. Es isch uf all Faell so gsi, wie ich mir Kanada vorstelle. Mir hend au es wilds Ross gseh und sehr vil schoeni Voegel plus es paar Emus und Kangaroos vo Witem. D Strass isch noed wueklich e richtigi Strass gsi und Adventure Tours segi anschinend die einzigi Organisation, wo die Strecki fahri und es het sich aso mega glohnt gha. Es isch eifach e traumhaft schoeni Landschaft gsi!

So, jetzt macht leider s Internet-Cafe zue. Bis bald wieder!

von rebifurrer um 08:29 | Kommentare (0) | Trackbacks (0)

Nach de Opere-Huus Tour han ich gester daenn d Faehre nach Manly gno. D Haupt-Shopping-Strass, the corso, isch no schoen gsi, halt so wie mer sich s ame touristische Strand vorstellt. De Manly-Strand selber isch einiges schoener gsi als de Bondi beach und au vil groesser. Det het ich mich jetzt gern chli id Sunne glaege, aber leider het d Sunne noed wuekli gschune.

Nach frittierte Krevetten und Pommes bin ich daen zum Kangaroo Park gloffe, wo s ufeme Berg e Kangaroo-Statue gha het. De Weg dezu isch u schone gsi und ich ha es paar Eidechse gseh. Leider hani aber nur zwei chlini choene fotographiere, da die beide groessere zschnell weggrennt sind.

Woni wieder zrugg in Sydney gsi bin, hani per Zuefall endlich s Opal-Museum gfunde. Det hani eigentlich scho lang mal hi welle, aber bisher hani s noed gfunde gha resp. bi noed dra ane gloffe. Es isch u herzig gmacht gsi, mit diverse Dinos, da sie ebe es paar opalisierti Dinosaurier-Chnoche gfunde hend und die usgstellt gsi sind. Es het natuerli au en Shop gha, aber det het mis Budget leider kein Chauf zueglah. Ich ha daenn aber als Gschenk e chlini Opal-Brosche i Form vo eme Kangaroo uebercho.

Am Abig sind daenn zwei neui Luet im Hostel gsi. Zum eine en Niederlaender, wo so vo Neuseeland gschwarmt haet, dass ich am liebste grad all mini Plaen verworfe heti und doch no nach Neuseeland gfloge waeri, und zum andere e scho chli aelteri Englaenderin, wo e 6-monatigi Weltreis macht und nacher ebe au no uf Neuseeland gaht. Sie isch zwar ueberall nur mega churz, aber immerhin zwei Wuche wird sie Neuseeland gnuesse choene. :-( Guet, zumindest wird ich s bald chli waermer und sunniger ha, hoff ich zumindest!

Huet Morge han ich eimal meh mit de kanadier Pancakes gnosse plus mich no mit mine Zimmergnosse unterhalte. Nachher bin ich gmuetlich dur de Hyde Park gloffe, da ich eigentlich gar noed gwuesst ha, was ich no mache soell. Ich ha zwar de Olympic Park und de Zaronga-Zoo noni gseh plus noed allzu vil vo de Blue Mountains, aber da ich um 12.30 mit de Ilka (enere Duetsche woni bi studiVZ kenneglernt han) abgmacht han, het sich nuet so wueklich glohnt. Ich ha no es Denkmal fuer de Koenig Georg agluegt und ha ghofft, es laufi nomal en spannende Film im ANZAC Memorial. Det isch aber leider gar kein Film gloffe und drum han ich mich halt susch no chli schlau ueber Australie i Chriegszite gmacht.

Nachher bini daen i Richtig Paddy's Market gloffe, da ich det ebe mit de ilka abgmacht han. Ich bi aber no vil zfrue gsi, drum bini no chli dur d Laede gstoeberet. Ime Souvenir-Lade hani daen s erst mal wieder Schwizerduetsch ghoert und ha die zwei St.Gallerine natuerlich muesse aspreche. Sie sind scho en Monet in Australie, choemed vo Brisbane her und goend morn wieder zrugg id Schwiz.

Ich ha mit de Ilka abgmacht gha, da sie grundsaetzlich die gliche Plaen het, aso au ueber Aelbourne und Adelaide nach Alice Springs wot und mir allefalls heted welle zaeme ga. Mir hend aso ime cafe e heissi Schoggi gno und hend mal eusi Idee ustuscht. Nachher simer zu de OzTravel-Agency (mir chunt grad s duetsche Wort noed in Sinn) und hend eus berate la. De Typ het sich sehr vil Zit gno und fuer mich isch s Agebot grad passend gsi, aber sie het no welle chli Bedenkzit. Drum sind mir daenn zu ihre is Hostel und hend au no mit enere Kollegin vo ihre diskutiert. Bim Hostel het s au no en Ushang vo oepertem gha, wo es Auto het und ebefalls nach Melbourne, Adelaid und allefalls Alice Springs het welle. Er het aber gschribe, dass er 40 Taeg Zit het, was fuer eus zlang waeri. Leider isch de Italiener aber am schaffe gsi und mir heted erst am 7i meh Infos uebercho. D OzTravel-Agency macht aber am 6i zue und falls es mit dem Typ noed klappet heti, het ich also noed morn choene abreise. Drum bin ich also doch die Tour go bueche und wird mich aso morn i Richtig Melbourne ufmache. D Ilka het sich s nomal gnau ueberlegge welle, da sie allefalls au en Teil vom Weg mit em Zug mache wot. Mir blibed aber in Kontakt und vilicht gsemer eus ja doch nomal. Ich muess morn Morge jedefalls am 7i bi de Agency si, das heisst heut no packe und morn frueh ufstah und kei Pancakes meh. Defuer wird ich d Hauptstadt Canberra und vieles andere gseh. Ich freu mich!

von rebifurrer um 08:40 | Kommentare (0) | Trackbacks (0)

Ich ha noed vil Zit, aber ich lueg mal, wie wiet ich chume. Gester Abig bin ich ja en Komiker im Studio vom Sydney Opera House go luege. Es isch de Reginald D Hunter gsi, en Schwarze Amerikaner, wo aber jetzt in England lebt. Ich ha zwar noed jedes Wort verstande, aber grundsaetzlich bin ich mitcho. Er het Witz ueber die Schwarze, die Schwule, d Fraue, d Jude und no vil meh gmacht und obwohls mer amig fast chli z bloed gsi isch, het s mer doch no gfalle.

Huet Morge hani mi denn vom Lucky und em Jakob muesse verabschiede, da sie no fuer es paar Taeg chli in Norde ufe waend und ich nacher daenn nueme in Sydney si wird. Nachher bin wieder zum Opere Huus gange und ha e Tour gmacht. Die isch wuekli super gsi, vor allem die ganze Hintergrund-Informatione. Sie hend z.B. scho mit baue agfange, wo s no lang noed gwuesst hend wie s die ganze Schale wueklich konstruiere choend resp. oeb das Gebauede so ueberhaut machbar isch!... Usserdem hends mit 3 Jahr Bauzit und oepe 7 Mio. Choeste grechnet, wodrus daen 16 Jahr und oepe 2.2 Billione Dollar (huetige Wert) worde sind. Wil nach eme Regierigswechsel die Mehrchoeste nueme ok gsi sind, isch de daenisch Architekt abgreist und sie hend d Inneusstattig daen mit australische Architekte gmacht. Das het sozage ines neus Gebauede i de Schale vom aeussere Gebaeude drinne resultiert, was mer im Kontrast vo de beide Baustiel guet gseh chan.

S Opere Huus isch e Plattform vo unglaublich vilne verschiedene Verastalitige, vom Boxkampf (isch nur eimalig gsi, da s Publikum agfange kaempfe het) ueber Bodybuilding-Wettkaempf, Klassik-, Pop- und Rock-Konzert bis hi zu Ballet-Uffuehrige. Mir hend u Glueck gha, dass grad kei Vorbereitige ide grosse Konzerthalle gsi sind, so dass mir det sogar hend doerfe fotografiere. Isch wuekli cool gsi!

von rebifurrer um 08:31 | Kommentare (0) | Trackbacks (0)

Ich ha s huet endlich gschafft, e australischi SIM-Charte zchaufe und bin ab jetzt aso unter de Nummere 0424994381 zerreiche. Wahrschinli muend ihr no de Laendercode 0061 vore ane haenke, aber das wuered ihr ja daenn merke. Bitte beachted aber die momentan 8 Stunde-Zitverschiebig.

Huet Morge han ich bim Zmorge wieder chli franzoesisch versuecht zrede und d Kanadier hend mir den en chline Pin mit em Kanada-Wappe gschenkt. Das hani mega herzig gfunde. Nachher han ich mich daenn im Rege i Richtig Chinatown resp. Paddy's Market gmacht, wo ich daenn dur die viele Markt-Staend gschlenderet bin. Zum Glueck isch das alles inere grosse Hall gsi.

Zum Zmittag hani nomal Sushi gha und nacher bini dur s ganze Stadzentrum zum "the rocks" gloffe, das isch de aeltischti Teil vo Sydney, wo au d harbour bridge isch und det het s au no en chline Markt gha.

Aschluessend hani am Hafe une eme "street performer" zuegluegt, wo wuekli no idruecklichi stunts gmacht, au wenn er fuer min Gschmack chli zvil drum herum gredt het. Er het sich uf all Faell guet zverchaufe gwuesst und het zumindest oepis rechts fuer s "erbettlete" Geld gmacht. So bin ich also no schnell 5 Dollar los worde.

S noechste Ziel isch s Opere Huus gsi, wo ich eigentlich e gfuehrti Tour ha welle mache. Weg enere Vorstellig isch aber die grossi Konzert-Halle noed zuegaenglich gsi, weshalb ich daen nur es Ticket fuer en Comiker fuer huet Abig gkauft han. De tritt zwar noed ide Konzerthalle uf, aber ich ga daen morn Morge nomal zum Opere Huus go d Tour mache. Aja, falls es oepert interessiert, d WCs im Opere Huus sind aso sehr schoen!...

Uf em Rueckweg bin ich no ame stone hedge verbi cho, wobi das eifach us diverse Bruchteil vo Gebauede vo de Stadt und de Brugg "gmacht" worde isch. Es isch uf all Faell es Foto wert gsi und ich ha mich daen det ide Noechi no chli usgrueht gha.

Grad vorher bin ich no bim Coiffeur gsi. Die asiatische Fraue hends zwar guet gmacht, nur isch es mer schlussendli fascht chli zchurz worde. Naja, so muni zumindest noed scho bald wieder ga!...

Jetzt gani daen zrugg is Hostel resp. no schnell go poste. Zum Glueck hend da am Sunntig fascht all Laede offe. Nacher iss ich Znacht und mach mich bereit fuer d Comiker-Vorstellig im Sydney Opera House! :-)

von rebifurrer um 08:29 | Kommentare (0) | Trackbacks (2)

Da ich endlich mal no es paar Fotos wot ufelade, bin ich jetzt halt scho wieder ime Internet-Cafe. Aber es gaht so extrem langsam, dass ich noed weiss, oeb ich zumindest mal 10 Bilder schaffe bis s Internet wieder abstellt. Naja, hoffed mer s best.

Ich bi also huet mit em Bondi explorer unterwegs gsi und bis jetzt het s huet no nie gregnet gha. Am Morge isch es aso scho wueklich warm gsi, obwohl de Wind doch recht blase het. Die ersti Station, wo ich usgstiege bin, isch de Yacht club gsi. De isch schoen glege mit eme chline Park nebed dra, aber s usstige und 30min uf de noechst Bus warte, het sich noed wueklich glohnt gha. Am Rose Bay Convent het s daenn en ofizielle churze Foto-Stopp ge, zum eimal meh d Opere und d Harbour bridge knipse z choene. Aber zumindest isch jetzt de Himmel mal no blau gsi!...

Bim Watson Bay bin ich denn usgstiege und chli ade Kliffe entlang gloffe. D Ussicht uf de Ozean isch schoen gsi, aber es het extrem gwindet gha. Als noechsts bin ich daenn bim beruehmte Bondi Beach usgstige, was aber noed wueklich spektakulaer gsi isch. Ich ha mir de Strand uf all Faell vil groesser vorgstellt gha und vor allem hani ghofft, es paar huebschi Surfers bestune zchoene!... Aso, es het scho Surfer gha, aber nur wenigi und die, wo ich vo noechem gseh han, sind noed wuekli herzig gsi. Anyway, Coogee Beach isch ebefalls en chline Strand-Teil gsi, wo ich in Gnuss vome australian football-Spiel cho bin. Ich ha muesse feststelle, dass ich das glaub de bloedsti Sport uf Erde find, aber es soell ja jede sin Spass und sini Lideschafte ha. Uf all Faell bin ich bald wieder witer und ha no en Halt am Royal Randwick Race place gmacht. Das isch e immens grossi Pferde-Rennbahn grad nebed eme schoene Park. Leider isch alles zue gsi, aber d Rennbahn in Dielsdorf isch da degege mikrig.

Jetzt grad vorher bin ich no im Hyde Park gsi go s ANZAC memorial aluege, was scho sehr idruecklich isch. Die ligendi Skulptur i de Mitti gseht us, wi de gchruezigt jesus, wo uf em rugge lit und de Chopf hine abe haengt. Isch fascht chli gfuerchig gsi. D Usstellig dezue isch aber sehr interessant gsi und ich ha mich ueber die australischi Flagge schlau gmacht.

So, zumindest 10 Fotos hani choene ufelade, tuet mer aber leid, dass es noni meh sind. Muend euch aso no chli gedulde, sorry!

von rebifurrer um 08:29 | Kommentare (0) | Trackbacks (0)

Leider hets gester Abig weg eme Fehler mit em speichere noed klapped und alles, woni i meh als enere halbe Stund gschribe gha han, isch gloescht worde, da ich ime Internet-Cafe gsi bin, wo d Zit uf ei Stund beschraenkt gsi isch. Drum muess ich jetzt halt alles nomal schribe. :-(

Nach em letste Itrag bin ich "hei" gloffe und nach em Znacht isch daenn en neue Zimmer-Gnoss izoge. Es heisst Lakshman und isch en Inder, aber Lucky isch eifacher zum saege. Er schaffet bi BMW und isch drum au scho in Duetschland und England gsi. Er het mich daenn churzerhand mit in Usgang gno und zwar zerst ines irishs Pub und nacher is "the Caff", en Nightclub. Obwohl zwar recht vil HipHop und RnB gloffe isch, isch es no laessig gsi.

Am Mittwuch hani daen chli laenger gschlafe und drum haets daenn leider kei Pancakes meh gae. Ich ha aber no chli Brot gha und ha mich daen uf de Weg zum Wildlife World gmacht. Das isch en Zoo zmitts ide Stadt, wo mer alli Tier vo Australie gseh chan, au die nachtaktive. D Possums, d Kangoroos und Wallabies sind mega herzig gsi, aber d Koalas hend eifach alles uebertroffe. Die sind wuekli de Hammer gsi!

Wil min Fotoapparat-Akku langsam leer gsi isch, hani noed welle riskiere, zmitst im Aquarium zstah und kei Fotos meh mache zchoene. Wil s aber scho wieder gregnet het, bini halt go luege, was im IMAX grad so lauft. D 3D-Show ueber Wal und Delphin het mi daenn agmacht und drum bini also is IMAX theather gsaesse. Uf em heiweg bini no is Queen Victoria building, es wunderschoens, alts Gebaude, wo s vil Laede dinne het und im oberste Stock au no e Galierie und e Handtaesche-Ustellig mit es paar coole, antique Modell.

Am Abig hetis gratis Wii und Chaes im Hostel gae, aber die scho zimli betrunkene Luet hend mi noed wuekli agmacht, weshalb ich daen wieder is Zimmer ufe bin resp. mit em Lucky en Spaziergang gmacht han, zum es paar Fotos vo Sydney by night zmache.

Am noechste Morge han ich bim Zmorge es Paar vo Quebec kenneglernt, wo grad mit ener Duetsche am rede gsi isch. Die Duetschi het sich im Franzoesisch versuecht und wo sie daenn es Wort noed gwuesst het, han ich das uebersetzt und bi mit ihne im Gsproech gsi. Fuer das hani daen mis Franzoesisch zunderst une im Hirni muesse usgrabe, aber es isch sogar einigermasse gange. Er het eifach au no en extrem starche Akzent gha, aber es isch uf all Faell luschtig gsi.

Nachher hend de Lucky, de Jakob (de Duetschi us em Zimmer) und ich es Auto gmietet und sind i Richtig Blue Mountains gfahre. Obwohl s Waetter scho in Sydney recht schlecht gsi isch, sind mir optimistisch gsi. Leider isch es aber je laenger je meh regnerisch, chalt und neblig worde. Wo mir denn am Echo Point in Katoomba acho sind, hend mir vo de "three sisters", e anschinend schoeni Felsformation, ueberhaupt nuet gseh. Es isch eifach alles grau in grau gsi.

Da mir noni hend welle ufgae, sind mir daenn uf Leura gfahre, um zumindest no es paar schoeni Gaerte zgseh. Am Igang isch niemert gsi zum Itritt verlange, da sie bi dem Waetter anschinend noed allzu vil Luet erwarted hend. Mir sind aber schoen brav zum Shop abe und hend euse Itritt zahlt. Im Garte het mer zumindescht schoeni Natur, es paar roti Voegel, en Wasserfall und susch no es paar Sache choene gseh, worum sich de Bsuech doch meh glohnt het, als die drue Schwoschtere im Nebel.

Nachher simer zrugg uf Sydney und nach em Znacht simer mit es paar Luet vom Hostel uf e Pub-Tour. Ich waer zwar a mim Geburtstag lieber go Salsa tanze, aber bis jetzt hani noni usegfunde, wo das moeglich isch. Drum hani denkt, dass das sicher luschtiger wird, als im Hostel zblibe. Mir sind also i drue Pubs gange und am Schluss wieder is "the Caff" zum no chli tanze. Mir isch daenn no vom Londoner Chris en Baileys zahlt worde, zur Feier des Tages. Es isch zwar en Abig mit vil sehr heitere Luet worde, aber es het doch Spass gmacht und ich ha recht vil Luet kenneglernt.

Am noechste Morge hani s knapp no zu de letste Pancakes gschafft. Wils leider scho wieder gregnet het, hend de Lucky und ich is Aquarium welle. D Schlange vor em Igang isch aber so lang gsi, dass mir zerst no is Maritime Museum gange sind. Obwohl ich det scho mal gsi bin, hani doch nomal es paar laessigi Sache choen gseh. Nach eme Kebab zum Zmittag sind mir doch no is Aquarium gange, was wuerklich super gsi isch. D Seeleue hend de Koalas zwar Konkurrenz gmacht, aber nur e chli. Aber so noech bi riisige Haie und Roche choene zsi, isch sehr idruecklich gsi und es het sich sicher glohnt gha, zum det hi zga.

Ja und nacher bini ebe e Stund ime Internet-Cafe gsi, wo s mer daen leider de Blog noed gspeicheret het. defuer hets am Abig im Hostel Pizzas ge, wobi die naoed wuekli super gsi isch. Fuer australischi Verhaeltnis isch sie aber guet gsi. Nachher han ich nur no chli glese und bin daen frueh is Bett.

Huet Morge han ich mich nomal mit em kanadische Paar und de Duetsche uf franzoesisch (oder so aehnlich) unterhalte und bi nacher in Bondi explorer Bus igstige. Ich bi jetzt uf em weg an Bondi Beach, em anschinend aschoenste Strand vo Sydney. Mal luege, oeb s Wetter hebet, es schint naemlich mal usnahmsis d Sunne vome zimli blaue Himmel!...

von rebifurrer um 01:59 | Kommentare (0) | Trackbacks (2)

Uf em Flug vo Singapore nach Sydney hani daen kei Begleitig meh gha, defuer haends s Unterhaltigssystem choene repariere und ich bi aso doch no zu es paar Film cho. Ich ha "27 dresses" und "P.S. I love you" gluegt plus no de Afang vo "Juno". So isch de Flug zimli schnell verbi gange, nur han ich sehr wenig gschlafe, da mer daen scho am 5i acho sind. Am Flughafe isch daen aber d Tuer vom Flugzueg noed ufgange und mir haend recht lang muesse warte bis d Mechaniker cho sind. Naja, schint ja es super Flugi gsi zsi!...

De Empfang in Sydney isch uebrigens noed wuekli warm gsi. Aso, ich meine wettermaessig. Guet, es isch no frueh am Morge gsi, aber es isch sehr regnerisch und recht chuehl gsi.

Warte hani daen au u lang muesse, woni endlich en passende Bus fuer id Stadt gfunde han. De Fahrer het zerst welle de ganzi Bus voll ha und ich bi halt leider die ersti gsi!... Nach chli meh als enere Stund im stehende Bus isch er daen endlich is Stadtzentrum gfahre und ich bi im Harbour City Backpackers acho. Ich ha ime gmischte 4er-Zimmer buechet gha und bi daen ines Zimmer mit zwei junge Duetsche iteilt worde. Sie sind beidi scho recht lang det und blibed no mindestens bis Endi April. De einti schaffed da chli als Schriner und de anderi versuecht de Luet en Milch-Lieferservice zverchaufe.

Nach em Zuegs verstaue bini go Zmorge aesse und die legendaere Pancakes sind wuekli u fein. Det hani no e Hollaenderin kenneglernt, wo aber leider gester wieder abgreist isch. Sie het mer aber es paar Tipps ge und ich bin daen in noechste Supermarkt go es Schloessli fuer min Gepaeckchaste chaufe. Da ich drum mini Wertsache noni ha choene ischluesse, hani halt alles muesse mitschleppe. Isch chli umstaendlich gsi, aber ich bi ja selber schuld, wenn ich s Schloessli dihei zwar ide Hand gha han, aber daen doch noed ipackt han.

Nach dem ich daen mis Zuegs ha choenne verstaue, han ich mich is Zentrum ufgmacht. Grad vis a vis vom Packpackers haets es Laufband, wo bis is Stadtzentrum gaht. Das isch sehr praktisch, aber leider isch es nur jewils uf em Hiweg gange. Aber es isch au zum ganz selber laufe noed wueklich wiet. Ich bin daen in botanische Garte, was wuekli wunderschoen gsi isch. Vor allem d Flaedermues uf de Baeum sind cool gsi. Die hets wuekli in Schare ume gha und sind no zimli aktiv gsi. Leider hets daen aber zuenftig agfange regne und ich ha mich ufeme Baenkli under es paar Baeum chli schuetze versuecht, da ich leider de Schirm noed mitgno han. Das haet zumindest am Afang relativ guet gnuetzt, aber wo s daen immer meh gregnet het, bini daen witer und noime anders undere gstande. En Australier tuerkischer Abstammig isch daen verbi gloffe und het Verbarme mit mir gha. Er het mer es Plaetzli under sim Schirm abote und so bini zumindest wieder chli id Stadt zrugg cho.

Wil doch zimli nass worde bin, chalt gha han und de Rege immer noni ufghoert het, bini den ines Cafe mich go ufwaerme und nacher zrugg is Backpackers. Det waeri am liebste go dusche und is Bett, aber es isch erst 14.00 Uhr gsi. Drum han ich unbedingt no chli Zit muesse useschinde und ha mich daen ufgrafft, nomal id Stadt zga, aber das Mal mit Schirm. Ganz treu nach Murphys law isch s daen schoen blibe und ich ha mich i Richtig Hafe ufgmacht. Det het s es paar Aborigines gha, wo Ditcheridoos gspielt hend und ihri CDs verchauft hend. Ufeme Baenkli ide Sunne bini daen immer wieder ignickt, weshalb ich daen doch langsam wieder zrugg ha welle. D Duschi het mi daen zumindest wieder gnueg wach gmacht, demit ich no oepis Znacht ha moege choche, aber am 6i bini daen is Bett und ha kei Site meh moege im Reisefuehrer laese!...

Am 11i bini daen nomal ufgwacht und ha no chli choene im Reisefuehrer schnuppere und hoffe, dass ich doch no schlafe cha. Ja, mued bini gnueg gsi und ich ha daen bis am 6i gschlafe. Bis am 7i hani mi no chli im Bett umegwaelzt und am 7i bini daen ufgstande und langsam abe go Pancakes esse. Gli druf bini an Wooloomooloo Hafe abe, de Ort, wo em Quartier vo "mim" Backpackers de Name git. Das isch nuet speziells gsi, aber ich ha det welle in Sydney Stadt-Bus istige. Wo de cho isch, hani de aber noed erkennt, da s noed en offizielle Wage gsi isch und drum isch de daen halt ohni mich abgfahre. Da ich noed no lang ha welle warte, bini daen halt zfuess zu de noechste Busstation gange und das isch d Mrs. Macquaries chair gsi. Vo det us het mer u super Ussicht uf s Operehuus und d Harbour Bridge gha und det isch daen au en offizielle Sydney explorer Bus cho. Mit dem bini daen zum Hauptbahnhof gfahre, aber de Halt het sich noed wuekli glohnt. China Town, die noechst Station, woni use bin, isch daen um einiges besser gsi. Det bini daen au id Chinese Gardens gange, was wuekli mega schoen gsi isch. Per Zuefall haend s au no en Chinese Culture Day gha und so bini no in Gnuss vo diverse Aktivitaete cho, wie z.B. e traditionelli Tanzshow mit schoene Chleider, zwei Musiker und eine, wo mit de Chind und de Chind-Blibene chli Kong Fu gmacht het. Nacher han ich mir Sushi zum Zmittag gkauft und bi witer zum Fischmarkt. Det het s daen no es paar frittierti Fisch-Stueckli und drue Krevetten-Spiessli ge.

Nachdem de Bus wieder mal verbi cho isch, han ich mir det voll mis Chnue agschlage, so dass es fascht noed versurret isch. Ich bin daenn bis zum National Martime Museum mitgfahre, wo s e interessanti gratis Usstellig gha het. Trotz leider immer no chli Schmerze im Chnue bini daen ueber d Brugg zum Aquarium und em Wildlife Centre gloffe, aber da ich fuer das noed stresse wot, gang ich daen es anders Mal no zfuess det hi. Mit em Bus bini drum witer und bi im alte Sydne usgstiege, also bim "the rocks". Vo det choent mer d Harbour Bridge bechlettere, aber es isch no zimli tuer (169$). Mu mer no ueberlegge, oeb ich das daen au no mache wot, oder noed.

Im Tourist Info Center han mi daen no mit es paar Prospekt ideckt und nacher bini wieter nach North Sydne gfahre. Det bini daen chli vo de andere Stadtsite uf d Harbour Bridge gloffe und ha es paar Fotos gmacht. Nachher bini daen mit em Bus bis nach Kings cross, woni au jetzt no bin. Da haets ime Backpackers Reisebuero naemlich gratis Internetzuegang fuer Backpackers und so han ich jetzt ganz eifach und usfuerlich choene vo de letste zwei taeg brichte. Jetzt haets zwar glaub kein Bus meh zrugg, aber es isch au noed allzu wiet zum laufe. Mis Chnue wird sich zwar wahrschinli wieder melde, da ich jetzt wieder laenger gsaesse bin, aber das wird jetzt ignoriert.

Zum Znacht gits wahrschinli nur chli Muesli, aber vilicht organisiert s Hostel huet ja es guets Abigprogramm zum no es paar Luet kenne zlerne. Das ishc naemli irgendwie noed so eifach, da die meischte Langzitufenthalter sind und sich scho Gruppe bilded haend. Guet, gester bin ich ja au sehr frueh is Bett, aber es heti au nur es Quiz ge und uf das heti e noed wuekli Luscht gha. Mal luege, was de Abig huet no so bringt.

von rebifurrer um 09:42 | Kommentare (0) | Trackbacks (0)

Ich bi jetzt grad am Flughafe Singapore ame Stand, wo mer 15 min gratis Internet zur Verfuegig het. Min Flug isch eigentli guet gange, nur han ich leider kein einzige Film choene luege, da s Unterhaltigssystem noed funktioniert het. Naja, uf das hani ich mich zwar mega gfreut gha, aber ich ha zumindest netti Unterhaltig gha. In Frankfurt hends mich naemli chli im zuegs ume gschickt, da mir no d Boerdingcharte fuer de Witerflug brucht hend. Da hani daen zwei lidensgnossinne gfunde und danke eme liebe icheck-typ haemer daen au chone nebed enand sitze. So isch aso de 12h-Flug trotz Systempanne ertraeglich gsi. Jetzt goend die zwei aber uf Melbourne witer und ich hoffe sehr, dass sie s System jetzt wieder anebringed, wil s susch daen doch nomal e langi reis wird!...

Abgseh vo de fehlende Unterhaltig isch es en agnehme Flug gsi, nur churz vor Singapore haets eimal extrem gschuettlet. Schlafe hani noed wuekli vil chone, aber in Singapore isch es jetzt ja au scho wieder halbi 7i und drum doerf mer ja scho langsam wieder mued si.

So, jetzt muni s langsam speichere, susch isch daen alles ume suscht gsi!.. Bis in Sydney wieder!

von rebifurrer um 12:25 | Kommentare (0) | Trackbacks (4)

Das isch also jetzt min erste Blog-Itrag! :-)

Mittlerwile isch min Rucksack packt und ich hoffe, ich ha alles, aber doch nöd zvil!

Ich möcht a dere Stelle allne ganz herzlich danke, wo gester cho sind! Us minere Sich isch es en wunderschöne Abig gsi und ich hoffe, euch hät s au gfalle! Merci für eui originelle Gschänkli und die liebe Wünsch und alli wertvolle Tipps!

So, jetzt muni an Flughafe und es gaht los! Juuhuu!!!

von rebifurrer um 17:03 | Kommentare (0) | Trackbacks (0)